د سیول انجنیري څانګې په هکله:
لرليد:
د لغمان پوهنتون سېول انجنيري څانګه د تدريس او څيړنې ښه کيفيت وړاندې کوي ترڅو روزل شوي کادرونه د هيواد په اقتصادي، ټولنيز او زيربنائي پرمختګ کې رغنده رول ولوبوي.
ماموريت :
د لغمان پوهنتون سېول انجنيري څانګه د زده کړو او څيړنو د معاصرو ميتودنو څخه په ګټه اخيستنې سره په ملي کچه علمي کادرونه روزي ترڅو د هيواد په بيارغونه او پرمختګ کې رغنده او موثر رول ولوبوي.
د سيول انجنيري څانګې تاريخچه:
که د ټولنې په ټولو اقتصادي ، ټولنيزو ، کلتوري ، ساينسي او تخنيکي برخو کې تجربه لرونکي او مسلکي کارګران ولري نو د يو هيواد ملي اقتصاد ګړندی او سالم وده کولی شي. نو په دې برخه کې د لغمان پوهنتون په چوکاټ کې د لمړي ځل لپاره په کال ۱۳۹۳ ه ش کال کې انجنيري پوهنځۍ دسيول څانګې سره تاسيس شو چې مشري يې د پوهنيار محمد خالد ناصري په غاړه وه. په کال ۱۳۹۳ ه ش کې د سيول څانګې ته کانکور آزموينې له لارې زده کونکي معرفي شول چې د هغې له پيل راهيسې ، دې څانګې د ليسانس فارغينو ، د درس ښوونې ميتودولوژيکي او ساينسي - څيړنيزو کارونو په روزلو کې د پام وړ ګامونه اخيستي او هيڅ ډول هڅو څخه لاس نده اخيستې.
د تاسيس سره سم د سيول څانګې امريت سرپرستي د محترم پوهنيار محمد خالد ناصري پرغاړه وو. د انجنيري پوهنځي تاسيس سره سم دوه تنه استادان په رسمي ډول سيول څانګې ته تقرر حاصل کړ چې تدريسي بهير د نوموړو استادانو او قراردادي استادانو لخوا پر مخ وړل کيده چې اوس مهال خوشبختانه د سيول څانګې رسمي استادانو شمير 8 تنو ته رسيږي چې اکثريت استادان د ماسترۍ تر کچې زده کړې لري. اوس مهال د سېول څانګې دوه تنه استاد د هيواد څخه بهر خپل دکتورا زده کړې پرمخ وړي.
سېول انجنيري څانګه په خپل ۷ کلن مزل کې د 297 ځوان، په کارپوه، ژمن او په هېوادنۍ مينې سمبال انجنيرانو د فراغت وياړ لري ترڅو د خپلې ټولنې چوپړ وکړي. د دغه څانګې څخه د فارغو شوؤ انجنيرانو يو شمېر د هېواد په دولتي او خصوصي سکټورونو کې پر دندو بوخت دي او يوشمېر نور يې توانېدلي چې د ځينو بهرنيو هېوادونو د لوړو زده کړو سکالرشيپونه ترلاسه کړي چې دا مهال د لوړو زده کړو په درشل کې دي.