د انجنیري پوهنځي د رئیس پیغام
که د ټولنې په اقتصادي ، ټولنيز ، کلتوري ، ساينسي او تخنيکي برخو کې تجربه لرونکي او مسلکي اشخاص ولرو نو په دې سره به د يو لوړ اقتصاد لرونکي هيواد شاهد واوسو. دا چې د يو هيواد زياته سرمايه په زيربنايي پروژو باندې په مصرف رسيږي، نولازمه ده، چې د نوموړو پروژو د تنظيم او مديريت له پاره په اړونده برخه کې ځوان، پرانرژي او په عصري ټيکنالوژۍ سمبال انجنيران ولرو، نو په همدې اساس د لغمان پوهنتون رهبرۍ د پوهنتون د ستراتيژيک پلان له مخې په ۱۳۹۳ هـ ش کال کې د لوړو زده کړو د محترم وزارت تر منظورۍ وروسته په ياد کانون کې د انجنيري پوهنځی تاسيس کړه، چې لرونکی د يو ديپارتمنت ( سيول انجنيري) ده. د انجنيري پوهنځي د رسمي استادانو شمير اتو تنو ته رسيږي، چې ټول يې د ماسترۍ تر کچې زده کړې لري خوشبختانه بايد وويل شي، چې دوه تنه استادان د دکتورا بورس ترلاسه کړی، چې اوس مهال په چين او هندوستان هيوادونو کې خپل د دکتورا زده کړو ته ادامه ورکوي. انجنيري پوهنځي د تاسيس کال څخه تر دا مهال (297) تنه ځوان په عصري ټيکنالوژۍ او هېوادنۍ مينې سمبال انجنيران د ګران هېواد د خدمت لپاره وړاندې کړي.
انجنيري پوهنځی هڅه کوي ترڅو د انجنيري فعاليتونو په برخه کې د نوښتونو يو فعال مرکز واوسي او تر څنګه يې خپله ټوله پاملرنه درسې چارو، مسلکيتوب، څيړنو، فرصتونو رامنځ ته کولو او د هيواد د ننه او د باندې نړيوالو ټولنو سره اړيکو لرلو ته ځانکړې کړي. په عمومي ډول زمونږ ماموريت د انجنيري په برخه کې معياري تدريس، څيړنو او عملي زده کړو لپاره د سيستماتيکو تګلارو رامنځ ته کول دي ، چې پر مټ به يې داسې انجنيران وروزل شي تر څو سربيره پر تخنيکي پوهې ټول هغه مهارتونه، چې په نوي عصر کې د يو بريالي او مسلکي انجنير لپاره اړين دي ، له ځانه سره ولري. د يو اباد، پرمختللي، هوسا او ښيرازه افغانستان په هېله.
پوهنيار انجنير محمد خالد ناصري
د انجنيري پوهنځي رئيس