د لغمان پوهنتون او په افغانستان کې د اندونیزیا سفارت ترمنځ د ګډو همکاریو تفاهملیک لاسليک شو
د مسؤلينو په وينا، د ياد تفاهملیک له مخې به لغمان پوهنتون او د اندونیزیا هیواد ځینې پوهنتونونه په علمي، تدریسي، څیړنو، تحصيلي بورسونو او نورو برخو کې ګډ کار او متقابله همکاري کوي.
یاد تفاهملیک د لغمان پوهنتون د رئيس پوهنمل دوکتور عصمت الله دراني او په افغانستان کې د اندونیزیا هیواد سفیر ډاکټر عارف رحمن له خوا د ویډیویي کنفرانس له لارې په داسې حال کې لاسلیک شو، چې د لغمان پوهنتون علمي چارو مرستیال پوهنیار محمد میرویس صدیقمل او د اندونیزیا سفارت استازي عبدالحمید صافي هم حضور درلود.
په افغانستان کې د اندونیزیا سفیر ډاکټر عارف رحمن لغمان پوهنتون د افغانستان په نویو پوهنتونونو کې یو مخ پر انکشاف او غوره پوهنتون یاد کړ، چې په وینا یې، د اندونیزیا هیواد پوهنتونونه ورسره د متقابلو علمي همکاریو لرلو لیوالتیا لري.
نوموړي د دوکتورا او ماسترۍ په برخو کې د تحصیلي بورسونو برابرولو په هکله ژمنه وکړه او زیاته یې کړه، چې د همکاریو لړۍ به دوامداره ساتي، د لغمان پوهنتون رئیس ښاغلي پوهنمل دوکتور عصمت الله دراني د اندونیزیا هیواد له نیک نیت او د همکاریو له ژمنې مننه وکړه او دا تفاهملیک یې لغمان پوهنتون له پاره یوه غوره لاسته راوړنه وګڼله.
په درنښت
د پوهنتون اداره
